ج- د الفلق سورت او د هغه تفسیر:

بِسۡمِ ٱللَّهِ ٱلرَّحۡمَـٰنِ ٱلرَّحِیمِ

د الله په نوم سره (پیل كوم) چې ډېر زيات مهربان، همیشه رحم كوونكى دى

﴿قُلْ أَعُوذُ بِرَبِّ الْفَلَقِ 1

(اى نبي) ته ووایه: زه په رب د سبا پورې پناه نيسم مِنْ شَرِّ مَا خَلَقَ 2

د هر هغه شي له شر نه چې ده پیدا كړى دى وَمِنْ شَرِّ غَاسِقٍ إِذَا وَقَبَ 3

او د تیارې شپې له شر نه كله چې تكه توره (او خوره) شي وَمِنْ شَرِّ النَّفَّاثَاتِ فِي الْعُقَدِ 4

او له شر د هغو (جادوګرو) ښځو چې په غوټو كې پوكي وهونكې دي وَمِنْ شَرِّ حَاسِدٍ إِذَا حَسَدَ 5﴾

او د حسد كوونكي له شر نه كله چی دى حسد (شروع او ښكاره) كړي [سورة الفلق: 1 - 5].

تفسير:

1- ﴿قُلْ أَعُوذُ بِرَبِّ الْفَلَقِ 1﴾: ووایه - ای رسوله - زه د سهار په رب پناه نیسم، او ځان ورسپارم.

2- ﴿مِنْ شَرِّ مَا خَلَقَ 2﴾: د هغه مخلوقات‍و له شر څخه چی ضرر رسوي.

3- ﴿وَمِنْ شَرِّ غَاسِقٍ إِذَا وَقَبَ 3﴾: او زه الله تعالی ته پناه وړم له هغو شرونو څخه چې د شپې له خوا د جاندارانو او غلو څخه څرګندیږي.

4- ﴿وَمِنْ شَرِّ النَّفَّاثَاتِ فِي الْعُقَدِ 4﴾: زه د هغو (جادوګرو) له شره څخه چې په غوټو كې پوكي وهونكې دي پناه غواړم.

5- ﴿وَمِنْ شَرِّ حَاسِدٍ إِذَا حَسَدَ 5﴾: او د هغه حسد کوونکي له شر څخه چې له خلکو سره دښمني کوي، د هغو نعمتونو په خاطر چې الله ورته ورکړي حسد کوي، غواړي چې دغه نعمتونه له دوی څخه لرې شي او دوی ته زیان ورسیږي.