L-Yaa kõ sɩd ne Wẽnde, A Naam zẽkame.

§ Yaa fo kõ sɩd tɩ Wẽnde, Yẽ n naan foom la A rɩlgd foom, Yẽ me la Soaada la yεlɑ Kẽnesda, Yẽ A Ye tãa n kẽnesd bon-naandsã yεlã.

§ Yẽ me la b sẽn tũud a soabã, rẽnd b sẽn tũud ne sɩd ka be n zʋʋg Yẽndã ye.

§ La Yẽndã la Zɩsgo, n yaa Bedre n pidi, n tar pẽgr tiging gilli, A tara yʋɩ sẽn manege la sɩf-rãmb sẽn zẽke, ad A ka tar mak-n-taaga, bũmb ka be n wõnd-A ye, A Naam yɩlgame.

Kõ sɩd ne Malεgsã

Bãmb me yaa bũmb naandse, Wẽnd naan-b lame ne nuura, A tũudmã yĩnga la sak-n-tũ tεka ne A saglsã.

-La bee b pʋgẽ, a Gibriila, tɩlgr be a yĩnga, sẽn sigda ne Wahɩ wã, nabiyaam-rãmbã nengẽ wã.

Kõ sɩd ne Gaf-rãmbã:

Bãmb me la Gaf-rãmb nins Wẽnd sẽn siki, A tẽn-tʋʋmbã zugu.

-Wala Alkʋrãanã- sẽn sig a Mohammad zugã. Wẽnd pʋʋsg la A tɩlgr be a yĩnga.

-Lingiilã sẽn sig a Isa zugã -tɩlgr be a yĩnga:

-Tawraatã, b sẽn sik n kõ a Muusa tɩlgr be a yĩnga:

-Zabʋʋrã b sẽn sik n kõ a Daawʋʋdã -tɩlgr be a yĩnga-

-A ɭbraahɩɩm la a Muusã gaf-rãmbã sẽn sik n kõ a ɭbraahɩɩm la a Muusã wã.

Kõ sɩd ne tẽn-tʋʋmbã:

La bãmb me la Wẽnd sẽn tʋmsã, A yembsã nengẽ, tɩ b wilig-ba la b noog b sũuri ne sẽn yaa sõma la arzãna, la b bugs-ba n yi wẽnga la Bugmã.

-La b sẽn tʋg n yɩɩd fãa yaa Ʋlʋʋ Al-ʿazmi (Loe-n-wãak-rãmbã), bãmb me la a:

Nuuhu, tɩlgr be a yĩnga.

ɭbraahɩɩma, tɩlgr be a yĩnga.

Muusa, tɩlgr be a yĩnga.

Isa, tɩlgr be a yĩnga.

Mohammade, Wẽnd pʋʋsg la A tɩlgr be a yĩnga.

Kõ-sɩd ne laahr raarã (yaoolem raare):

La yẽ me la bũmb ning sẽn be kũumã poorẽ, yaoogã pʋgẽ la dũni yikr raarã, la b sẽn na n yik nebã b yãadẽ wã n geel-ba, wala zĩig ningã arzãn rãmb sẽn na n tabl b zagsẽ wã tɩ Bugum koambã, bãmb me tabl b zagsẽ wã.

Kõ sɩd ne Alƙadrã (Pʋlʋngã) a noogo la a toogo:

Alƙadrʋ (Pʋlʋngã) yaa fo loe n wãage tɩ ad Wẽnde, A mii bũmbã fãa gilli sẽn yɩt bõn-naandsã pʋgẽ, la ad A gʋlsa rẽnda Al-lawhʋ Almahfʋʋzã (walag sẽn gʋls bũmbã fãa gilli) pʋgẽ, A leb n tʋlla A belemã, la a naanegã.

A yeelame, A Naam zẽkame: {ad Tõndo, bũmbã, fãa D naan-a lame ne geelgo. 49} [Sʋʋratʋ Al-ƙamarʋ: 49]

La a yaa dargε a naase:

Rẽenemã: yaa Wẽnd minimã, A Naam zẽkame, sẽn be rẽnda pʋgẽ, yaa A minimã sẽn reng taoore, ne bũmb fãa gilli, taoor t'a na n ka yɩ, la a yɩɩbã poorẽ.

Lɑ dɑliilã yɑ A Koεεgã sẽn yeelã; A Naam zẽkame: {Ad yaa Wẽnd n tɑrɑ dũni wã yikr bãngre lɑ A sikd sɑ-koom, lɑ A mi sẽn be rogsẽ, lɑ yõor kɑ mi ɑ sẽn nɑ n pɑɑm beoog ye, lɑ yõor kɑ mi ɑ sẽn nɑ n ki tẽng ning ye, ad Wẽnd yɑɑ Bãngdã n yɑɑ minim tẽng-n-biigɑ.34}. [Sʋʋratʋ Lʋƙmaanʋ: 34].

Yiib soaba: yaa tɩ Wẽnd gʋlsa rẽnda Al-lawhʋ Almahfʋʋzã (walag sẽn gʋls bũmbã fãa gilli) pʋgẽ, rẽnd bũmb fãa sẽn yɩ la sẽn na n yɩ, gʋlsame, tɩ be A nengẽ Gafã pʋga.

Lɑ dɑliilã yɑ A Koεεgã sẽn yeelã; A Naam zẽkame: (La yel-soaandɩ kʋɩlem-biis bee A nengẽ, ned ka me-a tɩ sã n pa Yẽ ye, la A mii sẽn be ween-n-vɩɩsẽ la mogrẽ, la vãoog buud pa lɩʋte, rẽndame t'A mi a tĩiri, pa bõn-beell sẽn be tẽngã ligs pʋgẽ, pa bõn-maasre pa koεεnga, rẽndame t'a be gaf sẽn vẽnegd pʋgẽ 59). [Sʋrɑtʋ Al-An-ɑɑmʋ: 59].

Tãab soaba: yẽnda yaa tɩ bũmbã fãa yɩta ne Wẽnd tʋlsem, la bũmb ka yɩte, sẽn yi A nengẽ, maa sẽn yi A bõn-naandsã nengẽ, rẽndame tɩ tũ ne A raabo, A Naam zẽkame:

Lɑ dɑliilã: yɑ A Koεεgã sẽn yeelã, A Naam zẽkame: {Ned ning sẽn wa n tʋlla yãmb pʋgẽ bɩ a tẽeg tɩrga.28 La yãmb pa tõe n tʋlla, rẽnda Wẽnd sã n tʋlla, sẽn yaa bõn-naandsã Gʋʋldã.29} [Sʋʋratʋ Attakwɩɩrʋ: 28, 29].

Naas soaba: yaa kõ sɩda tɩ bõn-yɩtɩ wã gilli yaa bõn-naandse, Wẽnd n naan-ba, n naan b mensã la b sɩf-rãmbã la b rãmbgã la bũmb fãa sẽn be b pʋgẽ.

Lɑ dɑliilã yɑ A Koεεgã sẽn yeelã; A Naam zẽkame: {tɩ Wẽnd n yaool n naan yãmbã ne bũmb ning yãmb sẽn tʋmdã 96} [Sʋʋratʋ Aṣṣaafaatʋ: 96].